Le Pelerinage de l’ame en prose [90]

[Chantilly, Musée Condé, ms. 140, f. 89v]

brandon de lumiere, et chantent en ceste maniere: Louee et glorifee soit la royne du ciel couronnee. Le roy le veult, si est bien raison que ensemble tous façions feste, car par elle sont creues noz joyes.

Ou jour de son Assumpcion quant a present ne fais point de mencion, car a la feste de l’Ascencion de son filz es cieulx tu pourras entendre aucunement icelle feste, car se elle ne feust ainsi grant toutesfois y eust il aucune similitude. Le pere honnora son filz a son Ascencion et a l’Assumpcion le filz sa mere. Aprés ce que tu as demandé du cercle estellé ou ces festes son festoyees, te vueil parler. La est le Zodiaque mis ouquel sont XII signes par ou le soleil passe XII fois l’an par moys. N’a pas si grans festes en iceulx signes comme tu as veu, car la sont sept signes ou le soleil semble aucunesfois estre obumbré et aucunesfois esclipsé, lesquelz on nomme Ariez, Thaurus, Scorpio, Capricornus, Libra, Sagittarius, car ses signes ne sont pas trouvez trop benignes. Aussi tost que Jhesus fut né trouvé fut ou signe de Thaurus, car Herodes le thoreau cornu lequel s’il l’eust trouvé, il le eust hurté et acravancé de ses cornes. Bien apparu de ceulx qu’il tua en lieu de lui. Et pour ce se muça il que ce signe lui estoit trop fier. Aprés fut ou signe d’Aries ou Sathan* en simple pel de mouton le vint hurter trois coups, et tempter pour savoir se a pechié le pourroit attraire, car par ce qu’il le veoit homme tantost le cuidoit decevoir.

Ou signe de l’escorpion fut veu quant fut receu a grant procession de ceulx de Jherusalem qui depuis mort lui

[f. 90]

procurerent.

En ce se monstrerent escorpions car par devant belle chiere lui furent, et tantost aprés le ferirent de la queue et le livrerent a mort. Judas aussi qui le trahy lui fut escorpion quant il le baisa et tantost il le livra aux juifz. Ou signe de Capricorne tantost aprés fut feru, c’est assavoir quant il fut presenté et accusé faulsement devant Pilate, lequel sans conseil le juga faulsement comme celui qui riens ne savoit ou qui se monstroit riens savoir. Car juge qui a auctorité de jugier par equité et n’a sens ne discrecion de tenir sa jurisdicion dont bien estre nommé Capricorne, c’est a dire chevre cornee, car pars qu’il ne scet riens et qu’il est juge – cornes a pour destruire. De la entra tantost en l’autre signe qui est appellé Libra, c’est a dire la balance de la croix en laquelle il fut ataché et fut le poix et le pris de la redempcion humaine en souffrant mort et passion.

En ce jour propre se trouva on ou signe appellé Sagittaire, ouquel les juifz le lardoient de leurs langues envenimees et poingnans qui grant grief lui furent. Longis aussi fort le larda quant il lui persa le coste de sa lance en espandant son precie[u]lx sang a terre. Et lors fut esclipsé le soleil comme il fut monstré a saint Denis.

Aprés il entra ou signe de Leon, c’est assavoir quant il descendi en Enfer pour en oster les sains peres et les sainctes meres. Bien estoit Enfer nommé Leon, car il devouroit toutes les ames qu’il trouvoit. Figuré estoit par celui que Sanson avoit tué, en la gueule duquel il

ou Sathan repeated twice

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s