Ma tres redoubtee Dame madame / la duchesse de Bourgoigne
Ma tresredoubtee dame Je me recommande a vous tant et si treshumblement comment je puis et vous plaise savoir que thenon vostre tresorriez / de nivernoiz ne ma riens baillie ainssy que autrefoiz mavez escript et mande par colas girart porteur de cestes et toutesfois / jay envoie ledit colas par trois ou quatre foiz par devers Girart vion maistre Jehan guesdat et ledit thenon pour Cuider / avoir appointtement pour faire vuider la garnison de ceste ville et aussy pour la gardez decy a noel lesquelx mont / mene de journee en journee, et au derrenier mont rescript quilz ne me bailleront rien se antraing et Cussy ne / vuident dont je suis bien esbay, car pour latente dudit appointement ay preste a mes compaignons plus de / mil frans pour les entretenir sans aler em berry affin que len ne peust dire que par moy ne par eulx les treves / fussent aucunement enfrainttes et que les ennemis neussent cause de eulx excuser de rendre lesdiz places / Si pouez asses savoir ma tresredoubtee dame que Cest grant chose que de entretenir une si grosse compaignie / sans avoir gaiges ne…onde Combien quil ne men est point en de mal car len na pas apoins a moy riens / baillier maiz ma len fait aller et envoier plus de vint voyages tant a dijon comme a Othun et autrepart ou / Jay despendu et froye pluz de cinq Cens escuz dor Sans avoir ung tout seul appointtement fors que en / pappier Si vous supplie ma tresredoubee dame que lon ne me mande plus pour moy faire despendre / le mien car Il souffit bien de le despendre en Ceste ville et peesse(?) quil nen A guerres en vostre hostel que / qui leur auroit fait faire ung voyage ou deux sans leur baillier argent qui enfussent point contens / et lon men a fait faire plus de quarante depuis que je suis en ceste ville de quoy lon ne bailli oncques ung / seul denier a moy ne a messaige que je y aye envoie. Quant mon tresredoubte seigneur le duc / fut devant la bassie’ lon me fist appointement de mil frans pour paier mes compaignons de quinze jours / comme les autres furent payes lesquelx mil frans mont couste a pourchassez plus de trois Cens / et si men doit lon encore mxx frans Si vous supplie ma tresredoubtee dame quil vous plaise moy tenir / pour excuse se je ne voys par devers vous ainssy que maviez rescript, car je ny pourroye aler que je ne / despendisse Cent ou vixx frans Je nay point dargent. monseigneur le regent et monseigneur de richemont / mont plusseurs foiz escript que je allasse par devers eulx laquelle chose je nay pas voullu faire Sans / congie de mondit seigneur ou de vous, maiz ay envoie devers mondit seigneur de richemont guiot vernique(?) et Jacquet crollan(?) / et devers mondit seigneur le regent messire pier’ lespaignol chevalier et denisot de uron et me semble selon le rapport / de mes messaiges que Chascun de mesdiz seigneurs vouldroit bien avoir Ceste ville en leur main Si / vous supplie ma tresredoubtee dame quil vous plaise parler a messeigneurs de vostre conseil que len men / descharge et que lon me paye une partie des froiz que je y ay faiz ou autrement Il mest force de / trouver ung moyen de moy en descharger car je ny ay plus que despendre Si vous supplie ma tresredoubtee / dame tant et si humblement comme je puis que qui ne mon vouldra descharger, quil vous plaise moy tenir / pour excuse se je la baille a mondit seigneur le regent, car quant aux armignacs je ne la bailleroy point quelque / argent quilz men vousissent donner Ma tresredoubtee dame je prie au benoist filz de dieu quil vous / acroisse honeur et vous doint bonne vie et longe et acomplissement de voz bons desir et vouloirs escript / en la charite le xxe jour de juing
vostre treshumble et obeissant / serviteur perrenet gressart
[signature P Gressart]
Middle French Transcriptions 