Archives de la Cote d’Or, B 11918

A mon tresredoubte Seigneur monseigneur Dauthune / Chancelier de mon tresredoubte seigneur monseigneur / le duc de bourgoingne

Mon tresdoubte seigneur Je me recommande a vous si treshumblement comment Je puis et vous plaise savoir que je veu ce que maves escript contenant en effet que lon vous / A donne a entendre que aucuns officiers de mon tresredoubte seigneur monseigneur le duc de bourgoingne ont este moyen et cause de la prinse de marcigny Et me requeres / et pries par vosdictes lettres que de ce vous vueille acertenez et quil Est de neccessite que vous le saichez pour aucunes causes qui ne me peuent tournez / a dommaige maiz vous en feray ung tressingulier plaisir Si vous plaise savoir mon tresredoubte seigneur que pour nul proffit ou dommaige qui men peust / advenir Je ne vous vouldroye ne oseroie acertenez de chose qui ne fust veritable ne de quoy me peussiez faire reprouche de present ne pour / le temps advenir, maiz je vous certiffie sur ma foy et sur mon honneur en payne den estre deshonnore se jamez trouves le contraire que oncques / homme officier de mondit seigneur ne sceut nouvelles de ladicte prinse non plus que faiz de la mort, ne ne men fusse fye en homme qui vive sil / neust este de mes gens, Et pour ce que me rescripves que soubz mes seing et seel vous vueille mandez les causes pour quoy je prins ladicte / ville, vray est que Javoie ung scelle de monseigneur de clermont de la somme de ii^m escuz dor, lequel seelle Inspira son temps environ(?) la souss’s / Si fuz aprisse des compaignons a qui estoit largent de payez Icelle somme de ii^m escuz, Et apres linspiracion dudit seelle A la requeste de / mondit seigneur de clermont et ausy pour amour dung mien cousin qui est en son service je prolonge Icellui seelle par deux foiz et a chascune / prolongacion me fist ou faulte de paiement donc Jay en ung grant dommaige. Et pour celle cause et non pour autre entreprins Je la prinse / dudit marcigny Et ja soit ce que pour ceste cause ne leusse prins, ne Cuide Je en riens avoir mesprins, car Jay veu par le contenu / des trevez derrierement prinses par monseigneur de savoye que ladicte ville de marcigny devoit estre remise ou point et estat quelle estoit par avant / sans y laissier garnison nulle, laquelle chose on na pas fait, maiz y a lon laisse garnison qui A fait pluseurs dommaiges en nostre party / quant elle a veu son avantage comme bien ampleint Je vous en Informeray quant vostre plaisir y sera, maiz se ne fust le faulte / de mon paiement Je me fusse bien deporte de la p’nd’ car Je ny ay riens gaignie et ma couste beaucop. Et affin que vous / Soyes certain de ce que dit est Jay signee ces presentes de ma main et seellees du sceau de ymbault de courcelles en absense Du / mien en tesmoing de ce mon tresredoubte seigneur commandez moy voz bons plaisirs pour Iceulx acomplir de tout mon pouoir au plaisir / de nostre seigneur qui vous doint bonne vie et longue Escript a la charite [sur loire] Cinq^me jour de fevrier

vostre serviteur [signature F laragonoys] / bailli de saint piere le moustier