Archives de la Cote d’Or, B 11918

Charles duc de Bourbonnois et dauvergne Conte de Clermont et de forez, per et Chamberier de france, et lieutenant de monseigneur le roy esdiz pais et es pais de Lyonnois masconnois et jusques a la Charite sur loire Incluse A tous ceulx qui ces presentes lettres verront salut Comme nagaires entre nostre / treschier et treshononore frere, le duc de Bourgoingne et de brabant tant en son nom comme ayant la bail gouvernement et adminestracion de noz treschiers et tresamez nepveux Charles et Jehan Contes de nevers et de rethel et de leurs terres pais et seigneuries dune part Et nous aux noms que dessus dautrepart Ayent este prises seurte et abstinence / de guerre en la maniere et comme est contenu es lettres sur ce Dont la teneur sensuit. Charles Duc de Bourbonnois et Dauvergne Conte de Clermont et de forez et seigneur de Beaujeu, per et chamberier de france, Et lieutenant de monseigneur le roy esdiz pais et es pais de lyonnois et masconnois et jusques a la Charite sur loire Incluse. A Tous ceulx / qui ces presentes lettres verront salut. Comme des long temps et depuis les piteuses et doloreuses guerres et division qui longuement ont regne et encores sont a present en ce royaume, Ayent este avisees faictes et prises certaines seurtez et abstinences de guerre, entre noz pais de Bourbonnois forez et beaujeulois Chastelchinon et Combraille dune part / Et les pais duchie et Conte de bourgoingne et de la Conte de charrolois dautrepart pour le bien et conservacion desdiz pais communement. Lesquelles abstinences de guerre par aucun temps, aient este assez bien et convenablement entretenus, et par aucun temps non. Mais aient este faiz dun coste et dautre pluseurs actemptaz au contraire. Pourquoy elles / aient oste par pluseurs fois reprises moderees continuees et ampliees. Et il soit ainsi que derrenierement et depuis aucun temps en ca lesdictes abstinences aient telement este enfraintes, par prises de places et autres exploiz de guerre en pluseurs manieres quelles soient du tout demourees en roupture pleinne sans quelque entretenement ne conservacion Dont / a ceste cause et autrement grans guerres debas et discors se sont engendre, meuz, et encommenciez entre nostre frere le Duc de bourgoingne et de brabant et les pais et subgez et autres declairiez esdictes abstinences de sa part, et nous nosdiz pais et subgez et autres compris et declaires de nostre part esdictes abstinences. Et dautrepart aussi entre nostredit / frere et nous se soient meuz et commenciez autres debaz et discords, tant a cause du fief et hommaige de la ville de Belleville Thisy perreny et dautres places et terres de la baronnie de beauJeulois, comme de pluseurs autres choses que nous demandoit nostredit frere. Et pareillement demandions et querellions a nostredit frere pluseurs / choses de nostre part. Sur lesquelles demandes et querelles dune partie et dautre Afin de remedier en tant quil est possible aux grans maulx et Inconveniens qui desja sont ensuiz et avenuz a ces causes, et obvier a ce que est apparent den avenir et ensuir encores plus grans, par la continuacion de ladicte guerre se briefment / ny estoit pourveu. Pour lonneur et reverence de dieu principalment, et pour consideracion de la grant proximite de sang et lignaige et aussi de laffinite qui est entre nostredit frere et nous qui avons espouses sa seur germaine, De laquelle graces a dieu avons de Beaulx enfans qui sont ses nepveux et niepces et aussi la / proximite de nosdiz pais de bourbonnois forez beaujeuloiz et chastelchinon, et de ceulx de nostredit frere, et des subgez diceulx qui sont et convient quilz soient et demeurent voisins, et pour le bien prouffit et preservacion desdiz pais et subgez, Et pour relever le poure peuple desdiz pais, des grans griefz dommaiges et / opressions quilz ont souffert pour le fait et occasion desdictes guerres, et empeschier autres Inconveniens et Dommaiges Innumerables qui seroient en voye densuir pour ledit fait de guerre, Ayons par bonne et meure Deliberacion, de conseil, et a pluseurs journees sur ce tenues entre les gens et ambaxeurs de nostredit / frere et les nostres par le moyen des gens et ambaxeurs de nostre treschier et tresame oncle le Duc de savoye, et de nostre treschier et tresame cousin le prince de piemont gouverneur de savoye, qui y ont este presens, et eulx emploiez en ces matieres comme mediateurs Consenti passe et arreste certains appoinctemens traictiez et / accords ensemble declaires plusaplain es lettres patentes sur ce faictes. Et entre autres choses que pour le temps avenir, se feront et fermeront entre nostredit frere et nous bonnes et seures abstinences A desdit de certain temps, par toutes les meilleurs et plus seures manieres que len scauroit aviser. Savoir faisons / que nous voulans et desirans pour lesdictes causes et consideracions, faire et acomplir de nostre part, ce qui a este traictie appoinctie et accorde en ceste partie entre les gens de nostredit frere et les nostres par le moien des gens de nosdiz oncle et cousin, les Duc de savoye et prince de piemont. Avons de nostre certaine science / consenti fait passe et arrese et par ces presentes consentons faisons passons et arrestons tout de nouvel, bonne loyale ferme et seure abstinence de guerre, estre et demourer doresenavant Au desdit de trois mois, Entre noz pais et subgez et autres de nostre part cy apres declaires, et ceulx de nostredit frere de bourgoingne / et autres qui pour son parti seront semblablement cy dessoubz declaires. Cestassavoir entre noz pais et subgez de nosdiz duchiez de bourbonnois et dauvergne Conte de forez seigneurie de beauJeulois, tant ou royaume que en lempire Chastelchinon et Combraille, et les villes forteresses et lieux de royaulte et autres / dedans iceulx enclavez Avec le pais du daulphine de viennois. Cite ville seneschaulcie et pais de lyonnois villes forteresses et lieux enclavez en iceulx. Tous lesquelz pais et enclavemens, tant en nostre nom prive comme aussi lieutenant esdictes marches, et nous faisant fort en ceste partie pour mondit seigneur /