Archives de la Cote d’Or, B 1623

f. 236v

Je jehan fraignot receveur general de Bourgoingne Confesse avoir eu et receu de messires des comptes a dijon / unes lettres patentes de madame la duchesse de Bourbon Contenant la forme quil sensuit. Nous / marie de Barri duchesse de Bourbonnois et dauvergne Contesse de forest et de montpensier et / dame de Beaujeu, congnoissons et confessons avovir eu et receu de nostre treschiere et tresamee fille / la Contesse de Nevers certainne vaisselle doree et armoyee pesant trois cens quarante neuf / mars cinq onces dargent laquelle avons prestee a monseigneur le roy en faveur du traictie et delivrance / a nous faicte par mondit seigneur du Conte de soumencet(?) pour et en esperance den rachater nostre treschier / et tresame filz le Conte den detenir prisonnier en angleterre laquelle vaisselle a este priste par mondit seigneur / le roy et son conseil A la somme de quatre mille trois cens soixante quinze livres tournois monnoie courant / et dicelle avons este assigne sur la porcion de laide dun million octroye a mondit seigneur es pais / de monseigneur sur laquelle somme de iiiim iiic lxxv livres tournois nous avons paiee a nostredicte fille la somme de / viic l livres tournois en vc escus dor par la main de nostre ame et feal conseillier laurent Andrant / a elle envoiez par messire guillaume Cuo son chappellain reste a paier iiim vic xxv livres tournois laquelle / reste nous lui promettons paier et rendre En tesmoing de ce nous avons fait mectre nostre seel / a ces presentes Donne en nostre ville de molins le premier jour doctobre lan mil cccc xxiiii / Ainsi signee Par ma dame la duchesse r. guerart, lesquelles lettres me ont este baillees / comme dit est pour recouvrer de madicte dame de bourbon au prouffit de monseigneur le duc de bourgoingne / sur et en deduction de la somme de deniers que len doit presentement paier a Charles de / Bourbon son filz la somme de trois mille six cens vint et cinq livres tournois restans a paier par ladicte / Dame de Bourbon de la devant dicte somme de iiiim iiic lxxv livres tournois laquelle somme / de iiim vic xxv livres tournois je prometz rendre au prouffit de mondit seigneur ou cas que je les pourray / recouvrer dont je feray mon devoir ou rendre les lettres dessus transcriptes Tesmoing / mon seign manuel cy mis le xve jour de decembre m cccc xxv.

Le iiiie jour de juillet m cccc xxvi ledit jehan fraignot A rendue en la chambre desdiz comptes les lettres / patentes originales de madame la duchesse de bourbon transcriptes cy dessus Et a expose A messires desdiz / comptes que il avoit faicte deue diligence de vouloir recovrer ladicte somme et reste de iiim vic xxv livres sur madicte / dame de bourbon mes ycelle dame avoit allegue paie et dicelle reste disoit avoir quictance / de feue madame la duchesse bonne dartois jadis contesse de nevers sa fille de laquelle quictance / elle fit baillier audit fraignot ung vidimus fait soubz le seel de la chancellerie du duchie de bourbonnois / lequel vidimus ledit fraignot A monstre et baillie en ladicte chambre des comptes Avec lesdictes lettres Afin / destre descharge de la memoire cy dessus, lesquelles lettres et vidimus messires des comptes ont / receues et mises ou coffre du tresor pour enquerir et savoir se feue madicte dame la duchesse / bonne cui dieu pardoint a este contentee de ladicte reste ja soit ce quelle eust faicte ladicte quictance ou consentee / estre passe etc Et en ont deschargie ledit jehan fraignot Et pour ce A este roie son saing manuel / cy dessus etc

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s