Archives de l’Allier, 1 E 187

A Tous Ceulx qui orront et verront ces presentes lettres Estienne gort secrectaire de tresexcellant et puissant prince monseigneur le duc de bourbonnois et / Dauvergne et garde du seel de la court et chancellerie de sondit duchie de bourbonnois salut Savoir faisons que guillaume merle clerc Jure notere de ladicte court / et chancellerie et le nostre ouquel quant adce nous avons commis a grosser et mectre en forme deue toutes les lettres et notes non grossees receues soubz ledit / seel par feu messire fontaud priguet jadis prestre et notaire jure de ladicte court nous a relate quil lui est deuement apparu en note signee du seing manuel / dudit feu et par lui receue soubz ledit seel que par devant Icellui feu notaire lors vinrent Personne establiz noble et puissant seigneur messire Jaques / de chabanes chevalier seigneur de charlus et grant maistre dostel de france pour lui et les siens perpetuelles dune part Et Damoiselle Johanne / des bourbes et guichart desoue son mary ladicte femme precedant avec lauctorite congie et license De sondit mary parrochien de bouce pour eulx et les / leurs perpetuels dautre part lesquelles parties de leur bon gre et bonne volente ont fait passe et accorde entre eulx les pemutacions et / eschanges qui sensuit Cestassavoir que ledit seigneur a baille et eschange par tiltre de permutacion pure vraye p’ste’ perpetuelle et Inrevocable ausdis / maries et es leurs p… et receveurs Cestassavoir trente solz tournois de cens et rente que ledit seigneur a et que lui comperte et appartient / sur ung pie assis en… autreroux(?) de lasse coste le pie De s… de la grainge devers orient le chemin commun tendant De lasse au / molin sequ…er le pie de gibellir devers occident le chemin tendant de lasse en lostel de soue Devers bize dautre part ensemble le fons / treffons et autrez droitz que ledit chivalier a audit pie Dessus confine et Desclaree Et en recompense des choses dessus permutees et eschangees / par ledit chevalier ausdis maries Iceulx maries ont baille et eschange par tiltre de permutacion pure vraye p’ste’ perpetuelle et Inrevocable / audit chivalier present et recevant et es siens perpetuels Cestassavoir quatre livres et Dix solz tournois de rente rendable et de prise que ladicte / Johanne des bourbes et guichart ont et ont acoustume de prendre et que leur doit et doit asseoir et assigner phelibert / Des bourbes son frere sur toute sa chevance ou en bon lieu et bien gesant et comme tout est contenu en certain contraulx sur ce / fait et receu par Jehan mareschal Jure notere Du roy nostre seigneur Et par ce que ladicte rente De prise de quatre livres Dix / solz tournois vault mielx que ledit pie et rente de trente solz comme Dessus est dit ledit chivalier a baille et tourne a ladicte Johanne / Des bourbes et a sondit mary la somme de quarent livres tournois monnoye aujourduy courant et de ladicte somme de quarente livres / tournois ladicte Johanne des bourbes a lauctorite de sondit mary sest tenue pour contente et bien paiee