dicelle. Et pour la garde et sehurte dicelle abstinance, et faire repparer et remettre en bon estat toutes choses que seroient faictes ou prejudice de ladicte abstinance par les gens et subgies de nostredicte dame. Avons commis et par ces presentes commectons les seneschal et bailliz de bourbonnois fores beaujeulois chastelchinon / et combraille leurs lietenants et Chascun deulx, en leur donnant puissance et mandement de par nostredicte dame, que tout ce quilz trouveront estre fait par voys de fait ou autrement ou prejudice desdictes abstinences que a main armee ou autrement ilz le repparent et facent repparer incontinant et sans delay / et en contraignant a ce tous ceulx que feront a contraindre sans aucun reffuz ou contredit et sur tant quilz se pourront mesfaire envers nostredicte dame, et en corrigant les transgresseurs de ladicte abstinance tellement quil en soit exemple a tous, et pour le pouoir a nous donne de par nostredicte dame / promectons tenir et faire tenir ferme et estables lesdictes abstinances de guerre, non venir ou consentir a venir au contraire. Et que dedans trois sepmaines nous ferons apporter en ceste ville lettres de nostredicte tresredoubtee dame seellees de son seel de la probacion de ladicte abstinance et / de ce que dessus avons fait, pour le bailler es gens de mondit seigneur de bourgoigne pourveu toutesvoye que semblablement mondit seigneur de bourgoigne fera bailler a celuy ou ceulx qui apporteront lesdictes lettres, semblables lettres de confirmacion de ladicte abstinance de guerre. Et quant aux entrefaictes / et dommaiges que len dit estre faictes ou entreprinses esdiz pais la repparacion se fera a lordonnance de mondit seigneur de bourgoigne et de nostredicte dame la duchesse de bourbonnois, Et en signe de verite nous les dessusdiz commis de nostre tresredoubte dame ma dame la duchesse de bourbonnois avons / mis noz seigns manuelz en ces presentes qui furent faictes et donnees a bourbon lanceys le xxviiie jour du moys davril lan mil CCCC et vint Ainsi signees Chastelmoraut, lespinace, G. de bar, R. roque Savoir faisons que nous voulans et desirans de tout nostre cuer le bien de paix / et transquillite desdiz pais et subgies Toutes ses choses traictiees accordees convenancees et confirmees par noz conseillers et commis dessus nommez contenues en leurs lettres cy dessus transcriptes, avons agreables fermes et estables, Et les approuvons louons et confirmons par ces presentes ou nom / de monditseigneur et de nous selon la forme et tenir des Lettres dudit traictie et accort cy dessus contenu En tesmoing de ce nous avons fait mettre nostre seel a ces presentes Donne a molins le xviiie jour de may lan de grace mil quatrecens et vint, En promectant par la foy de nostre corps / et en parole de princesse de tenir et faire tenir ferme et estable ladicte abstinance ensemble tout ce que par nosdiz conseillers et commis est fait traictie et accorde sur icelle sans aler ou faire aucune chose au contraire. Donne comme dessus /
[signature de bar]
Middle French Transcriptions 